Дзякуючы злітай базе зваротаў у КДБ, выкладзенай у сеціва «Кіберпартызанамі», стала вядома пра ўкраінку, якую ў Беларусі асудзілі за «шпіянаж», калі яна паехала ў Гомель да былога мужа па аліменты. Яе гісторыю расказвае «Радыё Свабода».
У жніўні мінулага года жыхарка Чарнігава Вольга (усе імёны змененыя) і яе сястра Кацярына разам з дзецьмі паехалі ў Беларусь. Былы муж Вольгі — беларус, і яна збіралася атрымаць у яго аліменты на 14-гадовага сына.
У Беларусі абедзвюх жанчын затрымалі па падазрэнні ў разведвальнай дзейнасці на карысць Украіны. Падставай стаў знойдзены ў тэлефоне Вольгі здымак ваеннай тэхнікі, зроблены сынам. Кацярына адседзела ў беларускім СІЗА пяць месяцаў і змагла вярнуцца ва Украіну, а сястру асудзілі на тры гады зняволення нібыта за шпіянаж на карысць Украіны.
Пакуль Кацярына знаходзілася ў ізалятары, яе муж Мікалай напісаў у беларускі КДБ, каб даведацца, з якой прычыны яго жонку затрымалі. «Радыё Свабода» звярнула ўвагу на зварот і звязалася з мужчынам.
Мікалай пацвердзіў, што летась звяртаўся ў КДБ.
— Мая жонка ўжо дома, але яе сапраўды затрымлівалі. Ёй інкрымінавалі разведвальную дзейнасць, шпіянаж. Яна пяць месяцаў сядзела ў ізалятары, але потым яе вызвалілі, нават не ведаю, як гэта адбылося. Бо я ж туды не мог паехаць — жонцы казалі, што калі прыедзе муж, то яго дакладна пасадзім, — распавёў ён.
Тым часам Вольга па-ранейшаму знаходзіцца ў зняволенні ў Беларусі.
— Знайшлі нібыта нейкі здымак у сына, яна з сынам ехала. У яе былы муж — беларус і не выплачваў аліментаў, і яны паехалі разбірацца, а іх там затрымалі. А малы ўзяў і сфоткаў нейкую ваенную тэхніку, і за гэта пасадзілі маці. Далі ёй тры гады, — патлумачыў украінец.
Паводле яго, жанчыны ехалі ў Гомель, але іх затрымалі неўзабаве пасля перасячэння мяжы.
— Сястра Кацярыны сядзела ў ізалятары, а цяпер ужо перавялі на турму. З улікам таго, што была ў ізалятары, лічыцца, што яна ўжо адседзела там адзін год, — паведаміў Мікалай.
Дзецям затрыманых украінак удалося вярнуцца на радзіму.
— Дзяцей мы змаглі вярнуць. Яе (Вольгі. — Заўв. рэд.) сыну цяпер 14 гадоў, а майму 15, яны былі разам і змаглі выехаць. Іх там не кантралявалі, і мы папрасілі знаёмых ім дапамагчы вярнуцца дадому, — дадаў украінец.
З мужчынам таксама звязалася «Медыязона» — ён расказаў выданню, што пасля пяці месяцаў у СІЗА яго жонку выправадзілі з Беларусі і паставілі ёй забарону на ўезд у краіну на 5 гадоў.