Аляксандр Лукашэнка і Уладзімір Пуцін сустрэліся ў Маскве. Што яны будуць абмяркоўваць за зачыненымі дзвярыма — невядома, але перад камерамі абодва гаварылі пра перамовы па Украіне. Тыя самыя перамовы, якія было вырашана правесці без удзелу Расіі і Беларусі, бо адна краіна — агрэсар, а другая — суўдзельніца агрэсіі. Не абышлося і без скаргаў: Пуцін скардзіўся Лукашэнку на Украіну, Лукашэнка скардзіўся Пуціну на суседзяў.
Лукашэнка расказаў Пуціну, што на межах Беларусі з краінамі ЕС «цяжкая сітуацыя».
«Мяне здзіўляе наогул, больш за ўсё мяне хвалюе, я пра гэта кажу, палітыка польскага кіраўніцтва. Навошта ім гэтая канфрантацыя? І літоўцы, і латышы дзясяткамі выкідваюць трупы праз мяжу. Ідзе нейкая колькасць мігрантаў туды, яны — плот пабудавалі — выкідваюць за плот да нас на мяжу. Цяпер снег растаў — агаліліся трупы, валяюцца проста на мяжы. З Афганістана, Ірана людзі ёсць, Афрыкі. Навошта забіваць людзей і выкідваць па-варварску? Гэта стварае напружанне», — паскардзіўся Лукашэнка Пуціну, забыўшы згадаць, што да мяжы мігранты трапляюць дзякуючы яго патуранню.
Другая скарга датычыла закрыцця пунктаў пропуску на мяжы Беларусі з краінамі ЕС. Нагадаем, што цяпер на мяжы з Літвой працуюць толькі два пункты пропуску, на мяжы з Польшчай — таксама два (адзін — для грузавога транспарту, другі — для пасажырскага), на мяжы з Латвіяй — адзін.
«Яны закрылі мяжу для нас і для вас. Вельмі цяжка працаваць. І нават кітайцам, казахам з палякамі і іншымі. На мяжы — шалёныя чэргі. Робяць гэта наўмысна. Мы мяжу ад іх не закрывалі. Вы ведаеце, што ў нас бязвізавыя суседзі, дые яны сваіх людзей сюды не пускаюць у сувязі з тым, што мы можам іх завербаваць», — падзяліўся Лукашэнка набалелым.
Трэцяя скарга была прысвечаная Літве.
«Асабліва літоўцы. Праводзяць вучэнні, у траўні плануюць яшчэ праводзіць. Стаім лоб у лоб на мяжы. Амерыканцаў перакінулі, немцаў, што дзіўна, урок не пайшоў на карысць. У Літву, Польшчу — батальёны. Мы, вядома, былі вымушаныя разгарнуць свае часткі і выставіцца супраць. Не ведаю, навошта ім гэта. Мы не збіраемся нідзе ваяваць. Крычаць, што Лукашэнка з Пуціным заўтра Еўропу захопяць. Ніколі не абмяркоўвалі нават такіх планаў, што мы хочам кагосьці захапіць. Сваіх праблем хапае, яшчэ не хапала кагосьці…» — заявіў Лукашэнка.
Паток скаргаў Аляксандр Лукашэнка завяршыў на аптымістычнай ноце, запэўніўшы, што Беларусь пераадолела санкцыйны эканамічны ціск. Ён таксама падзяліўся сваімі марамі пра тое, што калі Расія і Беларусь змогуць «забяспечыць вялізны беларуска-расійскі рынак і яшчэ дружалюбныя краіны», то, паводле яго, «нам вось так хопіць, і вам, і нам».
Лукашэнка таксама падзяліўся з Пуціным сваімі думкамі і пачуццямі.
«Таму я казаў калісьці, часу шмат трэба, і мы вырашым тыя праблемы, якія нам трэба разам з Расіяй вырашыць. Мы таксама хочам, каб украінцы былі з намі. Я думаю, адчуваю, што недалёкі той момант, калі і Украіна адумаецца і зразумее, дзе іх шчасце», — запэўніў ён Пуціна.