Урад зацвердзіў прапанаваны МПЗ спіс мадэляў аўто павышанай камфортнасці, за якія трэба будзе плаціць транспартны збор у дзесяціразовым памеры. Плаціць яго трэба як арганізацыям, так і фізічным асобам. Дакумент афіцыйна апублікаваны на Нацыянальным прававым інтэрнэт-партале, ён пачынае дзейнічаць задняй датай — з пачатку 2024 года. Тым часам падатковая падганяе кампаніі з выплатай транспартнага падатку, гэта трэба зрабіць да 22 сакавіка.
Спіс транспартных сродкаў павышанай камфортнасці ўключае мадэлі 17 аўтабрэндаў. З гэтага года на пералічаныя аўто, не старэйшыя за тры гады, трэба будзе плаціць збор у дзесяць разоў вышэй за стандартны.
Раней МПЗ паведамляла, што арганізацыі, у якіх ёсць аўто павышанай камфортнасці, ужо мусяць унесці аванс у кошт пагашэння павялічанага ў 10 разоў транспартнага падатку. Гаворкі пра фізічныя асобы тады не ішло. Аднак у пастанове Саўміна «Пра транспартныя сродкі павышанай камфортнасці», якую 20 сакавіка падпісаў прэм’ер-міністр Раман Галоўчанка, няма акцэнту на юрыдычных або фізічных асобах. З гэтага можна зрабіць выснову, што, аплачваючы падаткі, на зацверджаны пералік могуць арыентавацца ўсе ўладальнікі такіх аўтамабіляў.
Пералік транспартных сродкаў павышанай камфортнасці:
| Марка транспартнага сродку | Мадэль (версія) транспартнага сродку незалежна ад тэхнічных характарыстык і камплектацыі |
|---|---|
| 1. Audi | A8*, Q8*, R8*, RS6*, RS7*, RSQ8*, S8*, SQ8* |
| 2. Aston Martin | Увесь мадэльны шэраг |
| 3. Aurus | Увесь мадэльны шэраг |
| 4. Bentley | Увесь мадэльны шэраг |
| 5. BMW | 7*, 8*, M5*, M6*, M7*, M8*, X6*, X7*, XM* |
| 6. Bugatti | Увесь мадэльны шэраг |
| 7. Cadillac | Escalade |
| 8. Ferrari | Увесь мадэльны шэраг |
| 9. Lamborghini | Увесь мадэльны шэраг |
| 10. Land Rover | Range Rover
Range Rover Sport |
| 11. Lexus | LC*, LS*, LX* |
| 12. Maserati | Увесь мадэльны шэраг |
| 13. McLaren | Увесь мадэльны шэраг |
| 14. Mercedes-Benz | AMG Е*, AMG S*, AMG SL*, AMG G*, AMG GT*, AMG GLE*, AMG GLS*, G*, GLE Coupe*, GLS*, S*, SL*, Maybach* |
| 15. Porsche | Увесь мадэльны шэраг |
| 16. Rolls-Royce | Увесь мадэльны шэраг |
| 17. Toyota | Land Cruiser 300
Sequoia |
«*» азначае, што павышаны падатак будуць спаганяць з мадэляў (версій, серый, класаў) транспарту, найменне якіх пачынаецца з названых знакаў ці словаў.
У МПЗ тлумачаць, што насельніцтву транспартны падатак за 2024 год трэба будзе плаціць у 2025-м.
Нагадаем, пра транспартны падатак раней выказваўся Аляксандр Лукашэнка. На яго думку, плаціць за дарогі мусяць тыя, хто па іх перамяшчаецца: «Нейкую капейку заплацілі, і ўжо гвалт на ўсю рэспубліку: „Ах, многа“».
Чытайце таксама
