У вёсцы Крыжоўка Ждановіцкага сельсавета выяўлены выпадак шаленства ў казулі, якая прыйшла на ўчастак да мясцовых жыхароў. Пра гэта паведамляе выданне «Пристоличье».
Казуля выйшла з лесу, зайшла на прыватны падворак, дзе на яе накінуліся сабакі. Дзікую жывёліну вяскоўцы адвезлі ў ветпункт, але яна памерла. Аднак аналізы, узятыя ў загінулай казулі, паказалі ў яе наяўнасць шаленства.
«У сувязі з лабараторным пацверджаннем захворвання арганізавалі працу па вакцынацыі і рэвакцынацыі сабак, якія кантактавалі з казуляй, каб выключыць магчымасць інфікавання», — расказалі ў Мінскім занальным цэнтры гігіены.
Акрамя таго, на ўсёй тэрыторыі населенага пункта праводзяцца прафілактычныя мерапрыемствы: развешаныя інфармацыйныя памяткі з рэкамендацыямі пра перадухіленне шаленства і паводзіны падчас кантакту з дзікімі жывёламі. Ветэрынары таксама абыходзяць вёску для ўдакладнення абстаноўкі і прафілактыкі хатніх жывёл.