Адміністрацыя прэзідэнта ЗША Джо Байдэна дазволіла наносіць удары амерыканскай зброяй па расійскай тэрыторыі. Пра гэта, як піша ТАСС, ім паведамілі ў Пентагоне.
«Прэзідэнт нядаўна даручыў сваёй камандзе забяспечыць Украіне магчымасць выкарыстоўваць перададзеную ЗША зброю з мэтамі контрбатарэйнай барацьбы ў [раёне] Харкаўскай вобласці з тым, каб Украіна магла наносіць удары ў адказ па расійскіх сілах, якія атакуюць яе або рыхтуюцца атакаваць», — заявіў прадстаўнік амерыканскага абароннага ведамства, адказваючы на запыт ТАСС.
«Нашая пазіцыя адносна забароны на выкарыстанне [тактычных балістычных ракет] ATACMS або сродкаў далёкага паражэння ўнутры Расіі застаецца нязменнай», — адзначыў ён.
Як піша The Guardian, у чацвер адміністрацыя Байдэна змякчыла сваю даўнюю палітыку, якая забараняе Украіне выкарыстоўваць амерыканскую зброю супраць цэляў унутры Расіі. Аднак забарона знятая толькі на выкарыстанне ўзбраення ў расійскіх рэгіёнах, якія мяжуюць з Харкаўшчынай, адкуль Масква вядзе новы наступ. У астатнім нічога не змянілася, адзначаюць у Белым доме.
«Гэта значна павысіць нашую здольнасць супрацьстаяць спробам Расіі перабрацца праз мяжу», — пракаментаваў рашэнне адміністрацыі Байдэна прэс-сакратар Зяленскага Сяргей Нікіфараў.
«Мае права абараняцца ад нападаў»
Абмежаванні, звязаныя з выкарыстаннем перададзенай украінскім вайскоўцам зброі, зняла ў пятніцу, 31 траўня, і Германія. Цяпер УСУ змогуць наносіць удары па тэрыторыі РФ, заявіў у пятніцу ў Берліне прэс-сакратар нямецкага ўрада Штэфен Хебестрайт.
— Украіна падвяргалася атакам, у прыватнасці, у Харкаўскай вобласці з пазіцый у непасрэдна прылеглай да расійскай мяжы зоне. Мы перакананыя, што Украіна мае права ў адпаведнасці з міжнародным правам абараняцца ад гэтых атак, — цытуе Хебестрайта Bild.
Раней да зняцця абмежаванняў заклікалі кіраўнік NATO Енс Столтэнберг і кіраўнік дыпламатыі ЕС Жазэп Барэль.
Як не раз адзначаў у сваіх справаздачах Амерыканскі інстытут па вывучэнні вайны, Расія, карыстаючыся заходнімі абмежаваннямі, выкарыстоўвае свае памежныя тэрыторыі для нанясення бомбавых і ракетных удараў па ўкраінскіх пазіцыях і памежных гарадах, а таксама для канцэнтрацыі сіл і тэхнікі перад магчымымі наступленнямі.
Прэзідэнт РФ Уладзімір Пуцін, каментуючы гэтыя заклікі, заявіў, што краінам NATO варта было б «усведамляць, з чым яны гуляюць».
— Яны павінныя памятаць, што гэта, як правіла, дзяржава з невялікай тэрыторыяй з вельмі шчыльным насельніцтвам. І гэта фактар, які яны мусяць мець на ўвазе, перш чым казаць пра нанясенне ўдараў углыб расійскай тэрыторыі, — заявіў Пуцін.