Ізраіль паведаміў арабскім дзяржавам, што хоча стварыць буферную зону ў сектары Газа, каб перадухіліць напады пасля заканчэння вайны. Пра гэта паведаміла агенцтва Reuters са спасылкай на свае крыніцы.
Сцвярджаецца, што Ізраіль праінфармаваў Егіпет і Іярданію, а таксама Аб’яднаныя Арабскія Эміраты, з якімі нармалізаваў адносіны ў 2020 годзе.
«Ізраіль хоча, каб гэтая буферная зона паміж Газай і Ізраілем з поўначы на поўдзень перадухіляла пранікненне ХАМАС або іншых [тэрарыстаў] у Ізраіль ці напад на яго», — сказала адна з крыніц.
Таксама крыніцы сцвярджаюць, што Ізраіль праінфармаваў пра свае планы Саудаўскую Аравію, якая не мае сувязяў з Ізраілем і якая пасля пачатку вайны спыніла працэс нармалізацыі пры пасярэдніцтве ЗША, а таксама Турцыю.
Дарадца ізраільскага прэм’ера Нетаньяху заявіў у каментары Reuters, што іх план прадугледжвае знішчэнне ХАМАС, дэмілітарызацыю сектара Газа і дэрадыкалізацыю анклава. «Буферная зона можа быць часткай працэсу дэмілітарызацыі», — адзначыў ён.
Прадстаўнік ААЭ не адказаў наўпрост на пытанне, ці расказалі Абу-Дабі пра буферную зону. Пры гэтым ён адзначыў, што «ААЭ будуць падтрымліваць любыя пасляваенныя дамоўленасці, узгодненыя ўсімі зацікаўленымі бакамі» для дасягнення стабільнасці. Прадстаўнікі іншых краін не адказалі на просьбу пра каментар.
Развіваючы ідэю буфернай зоны, ізраільскі чыноўнік паведаміў The Times of Israel, што «служба бяспекі гаворыць пра нейкі буфер бяспекі на баку мяжы з сектарам Газа, каб ХАМАС не мог сабраць ваенны патэнцыял паблізу мяжы і заспець знянацку».