У Беларусі дзіцячыя садкі пачнуць працаваць паводле новага графіку, паведаміла БЕЛТА намесніца начальніка галоўнага ўпраўлення агульнай сярэдняй і дашкольнай адукацыі профільнага ведамства Альбіна Давідовіч. Адзначаецца, што зроблена гэта на даручэнне Аляксандра Лукашэнкі і для зручнасці бацькоў.
«У сакавіку гэтага года на сустрэчы з актывам Беларускага саюза жанчын кіраўнік дзяржавы вельмі выразна паставіў нам задачу, каб дзіцячыя садкі, іх рэжым працы забяспечвалі магчымасць працаваць мамам і ў цэлым бацькам. Рэжым працы садкоў мусіць быць максімальна набліжаны да працы арганізацый, прадпрыемстваў, фірмаў. Гэта велізарны кірунак, над якім мы працуем», — расказала Давідовіч.
Яна адзначыла, што заканадаўча такая магчымасць даўно існуе.
«У Кодэксе пра адукацыю акрэсленыя розныя рэжымы працы ўстановаў дашкольнай адукацыі. Ёсць кароткачасовы рэжым знаходжання — ад дзвюх да сямі гадзін, у іншых установах дзеці знаходзяцца 10,5 гадзіны, 12 гадзін і нават 24 гадзіны, то-бок кругласутачнае знаходжанне. Рэжым працы вызначаецца заснавальнікам з улікам запытаў бацькоў. На першым месцы цяпер максімальна ўлічваць запыты бацькоў. У нас у краіне большасць дзіцячых садкоў працуе з рэжымам 10,5 гадзіны, але ў кожным рэгіёне ёсць свае асаблівасці. Да прыкладу, Мінск ужо даўно вырашыў гэтую праблему, і больш за 97% дзіцячых садкоў функцыянуюць з рэжымам працы 12 гадзін», — паведаміла прадстаўніца Мінадукацыі.
Які ў выніку хочуць зрабіць рэжым працы ў дзіцячых садках у залежнасці ад рэгіёнаў, яна не канкрэтызавала, але паабяцала, што да верасня гэтае пытанне вырашаць.