«Прыёрбанк» уводзіць камісію за абслугоўванне валютных рахункаў. У некаторых выпадках яна дасягне 12 тысяч рублёў за месяц.
Банк з 1 верасня ўводзіць штомесячную камісію за сэрвіснае абслугоўванне рахункаў кліента ў далярах, еўра, злотых, фунтах стэрлінгаў, швейцарскіх франках і шведскіх кронах. Гаворка пра рахункі з сумарным сярэднядзённым астаткам ад 50 000 даляраў у эквіваленце.
Найвышэйшая камісія будзе па рахунках, на якіх сярэднядзённы астатак на рахунках перавышае 1 млн даляраў у эквіваленце, — 12 тысяч рублёў за месяц.
Калі астатак трымаецца ў межах ад 500 тысяч да 1 млн даляраў у эквіваленце, то камісія будзе на ўзроўні 9 тысяч рублёў у месяц, ад 300 да 500 тысяч даляраў — 4500 рублёў, ад 200 да 300 тысяч даляраў — 2500 рулёў, ад 100 да 200 тысяч даляраў — 1500 рублёў, ад 50 да 100 тысяч даляраў — 750 рублёў.
У банку ўдакладняюць, што пад сумарным сярэднядзённым астаткам грошай за месяц маюць на ўвазе астаткі на рахунках кліента ў далярах, а таксама ў еўра, злотых, фунтах стэрлінгаў, швейцарскіх франках, шведскіх кронах.
Раней «Прыёрбанк» з 1 чэрвеня ўводзіў штомесячную камісію за абслугоўванне рахункаў у далярах і еўра. Яна была на ўзроўні 750 рублёў і закранула тыя рахункі, на якіх захоўваецца больш за 50 тысяч даляраў ці еўра.
Чытайце таксама
