Сталі вядомыя новыя падрабязнасці законапраекта са зменамі для індывідуальных прадпрымальнікаў. Так, ІП могуць забараніць займацца аптовым гандлем і аказваць турыстычныя паслугі. Пра гэта паведамляе тэлеканал «Беларусь 1». Раней паведамлялася, што чыноўнікі хочуць скараціць спіс відаў дзейнасці для ІП. Тыя прадпрымальнікі, дзейнасць якіх не трапляе ў гэты скарочаны пералік, будуць вымушаныя або закрыцца, або адкрыць юрыдычную асобу.
Для індывідуальных прадпрымальнікаў хочуць увесці істотныя змены. Гэта прадугледжвае законапраект «Аб змяненні законаў па пытаннях прадпрымальніцкай дзейнасці». Так, чыноўнікі хочуць перагледзець спіс відаў дзейнасці, якімі могуць займацца прадпрымальнікі. Прапануецца, каб урад гэта зрабіў да 1 чэрвеня. Плануецца, што тымі відамі дзейнасці, якія не трапяць у абноўлены Саўмінам пералік, ІП не змогуць займацца. Тым, хто ўжо працуе па іх, дазволяць завяршыць бізнес да канца 2025 года. Выключэнне — ІП, якія займаюцца арганізацыяй і правядзеннем культурна-відовішчных мерапрыемстваў, яны змогуць працаваць да 1 ліпеня гэтага года.
Тыя ІП, якім можна будзе працаваць да канца 2025 года, затым мусяць будуць адкрыць юрыдычную асобу альбо ліквідавацца.
Як паведамляе тэлеканал «Беларусь 1», пералік відаў дзейнасці, якімі змогуць займацца ІП, цяпер прапрацоўваецца, ён будзе гатовы цягам двух месяцаў пасля прыняцця закона. «Да прыкладу, прапануецца, што ІП не змогуць займацца аптовым гандлем і аказваць турыстычныя паслугі», — сцвярджае тэлеканал, прадстаўнікі якога пагаварылі з дэпутатам Леанідам Брычам.
Нагадаем, законапраект са зменамі для індывідуальных прадпрымальнікаў паступіў у парламент, ён рыхтуецца для разгляду дэпутатамі ў першым чытанні.