Чатырохгадовы Джэк Бэйлі з Ілінойса знайшоў у сваім садзе блакітнавокую цыкаду. Незвычайнае насякомае перадалі ў дар музею натуральнай гісторыі імя Філда ў Чыкага, паведамляецца ў рэлізе гэтай установы.
У цыкадаў ярка-аранжавыя ці чырвоныя вочы, але рэдкая мутацыя, якую эксперты апісваюць як «адну на мільён», прыводзіць да таго, што на свет з’яўляюцца асобіны з блакітнымі вачыма.
«Мой чатырохгадовы сын Джэк быў на нябёсах ад радасці з таго часу, як яны пачалі з’яўляцца, і пачаў збіраць іх у вялікай колькасці. Мая дачка Кэралайн зазірнула ў яго вядзерца і ўбачыла блакітнавокую цыкаду. Яна прынесла яе і паказала мне», — расказала маці сямейства Грэта Бэйлі.
Здзівіўшыся, жанчына зрабіла некалькі фатаграфій і адпусціла насякомае. Увечары, калі высветлілася, што гэта вельмі незвычайная асобіна цыкады, сямейства зноў выправілася на яе пошукі з ліхтарыкамі і, што характэрна, знайшло.
Суседзі Бэйлі расказалі Грэце, што такімі цыкадамі цікавіцца музей імя Філда ў Чыкага, і жанчына напісала ліст у аддзел даследаванняў гэтай установы.
«Гэта першая блакітнавокая цыкада, якую я бачыў», — заявіў супрацоўнік музея Джым Лаўдэрман.
Цыкаду ўрачыста перадалі ў дар музею. На той час насякомае было мёртвае: у цыкадаў вельмі кароткае жыццё. Блакітнавокія асобіны з прычыны мутацыі таксама не могуць даваць нашчадкаў.
Нагадаем, большасць відаў цыкадаў выходзіць на паверхню кожны год, але ў ЗША ёсць два перыядычныя вывадкі цыкадаў, якія застаюцца пад зямлёй альбо 13, альбо 17 гадоў, і іх сумеснае з’яўленне адбываецца рэдка. У 2024 годзе ў ЗША пачалося прышэсце цыкадаў «Пакалення XIX» і «Пакалення XIII». Паводле традыцыі, закладзенай яшчэ ў XIX стагоддзі, нумарацыя ім даецца рымскімі лічбамі. Падвойнае з’яўленне двух вывадкаў цыкадаў гэтых пакаленняў наступным разам адбудзецца ў 2244 годзе. Папярэдняе ж нашэсце назіралася яшчэ ў часы кіравання трэцяга амерыканскага прэзідэнта Томаса Джэферсана.