Нядаўна жыхары сталічнага ЖК «Минск Мир» скардзіліся на залітыя вадой пад’езды і ліфты ў дамах — прычынай патопаў аказаўся крадзеж медных трубак з цеплавых шафаў, якія адказваюць за нармальную працу ацяплення. Міліцыя затрымала выкрадальніка — «гастралёра» з Гомеля, паведамілі ў ГУУС Мінгарвыканкама.
У канцы траўня насельнікі квартала «Заходняя Еўропа» ў жылым комплексе «Минск Мир» скардзіліся на патоп у сваіх пад’ездах і ліфтах, а кіраўнічая арганізацыя заявіла пра серыйныя крадзяжы медных трубак, пасля дэмантажу якіх прасочваецца вада.
«У выніку ўзлому дзвярэй павярховых цеплавых шафаў выкрадзеныя імпульсныя медныя трубкі. Інфармацыя пра гэтыя факты ўжо перададзеная ў праваахоўныя органы. Гэтыя трубкі адказваюць за нармалізацыю падачы ацяплення ад агульнадамавога цепланосбіта да павярховай сістэмы ацяплення на кватэры», — гаварылася ў паведамленні.
У міліцыі расказалі, што аператыўнікі крымінальнага вышуку затрымалі падазраванага — гэта 35-гадовы мужчына, ён прызнаў віну.
Затрыманы паведаміў, што прыехаў у Мінск з Гомеля і паспеў выкрасці медныя трубкі з шасці дамоў у новабудоўлях квартала. Ён пранікаў у пад’езд разам з жыхарамі і падымаўся на верхні паверх, а падчас спуску аглядаў цеплавыя шафы і дэмантаваў трубкі ў тых, якія не былі закрытыя на ключ.
— Пад'езды ж адчыненыя з раніцы — будаўнікі заходзяць, цэглай дзверы падпёртыя. Заходзіў у пад’езд — потым ліфт выклікаў, ехаў да 25-га паверха. Потым гэтую шафку адчыняў, бо яны адчыненыя. Адломліваў трубачку — і лесвіцай уніз, на наступны паверх. І так да першага, — патлумачыў сваю схему сам гамяльчук.
Выкрадзеную медзь мужчына прадаваў, а грошы выдаткоўваў на асабістыя патрэбы.