Літва можа абмежаваць час працы некаторых КПП на мяжы з Беларуссю

Кіраўнік Службы аховы дзяржмяжы Літвы (САДМ) Рустамас Любаевас заявіў, што вырас паток тых, хто заязджае праз тыя чатыры КПП на літоўска-беларускай мяжы, што засталіся. Ён адзначыў, што памежнікам важна забяспечыць належную праверку транспартных сродкаў, якія заязджаюць у Літку, а для гэтага неабходна зменшыць патокі, паведамляе Delfi.

— У нашых інтарэсах — найлепшы кантроль за замежнікамі, якія заязджаюць, я кажу пра грамадзян Расіі і Беларусі. Калі патокі такія вялікія, забяспечыць якасны кантроль складана, мы лічым, што адзін з магчымых спосабаў — змяншэнне патоку, каб забяспечыць якасць працэдуры праверкі, — заявіў Любаевас.

Ён дадаў, што ўрад Літвы найбліжэйшым часам мусіць абмеркаваць прапановы ў сувязі з павышэннем якасці кантролю. Любаевас лічыць, што калі КПП не закрыюць, то могуць абмежаваць час працы некаторых з іх.