Звольненая дырэктарка аднаго з самых папулярных беларускіх тэатраў

Святлана Карукіна звольненая з пасады дырэктаркі Рэспубліканскага тэатра беларускай драматургіі. Пра гэта рэдакцыі паведамілі ўласныя крыніцы.

Паводле іх інфармацыі, гэта адбылося яшчэ ў ліпені гэтага года. Пацверджаннем гэтага сталі змены на сайце тэатра. Прозвішча і партрэт Карукінай адтуль зніклі.

Святлана Карукіна нарадзілася ў 1969 годзе ў Мінску. У 1993-м скончыла філалагічны факультэт БДУ. З 2005 года працавала ў Рэспубліканскім тэатры беларускай драматургіі: галоўнай спецыялісткай па маркетынгу, галоўнай адміністратаркай, намесніцай дырэктара. У ліпені 2018 года стала дырэктаркай РТБД, змяніўшы на гэтай пасадзе Уладзіміра Карачэўскага — яго ў сакавіку таго года прызначылі генеральным дырэктарам Нацыянальнай кінастудыі «Беларусьфільм».

Апошнім часам РТБД заставаўся адным з самых папулярных беларускіх калектываў. Аднак рэпрэсіі не абмінулі і яго.

Увосень 2020 года РТБД пакінулі акторы Мікалай Стонька і Андрэй Новік. Першы зрабіў гэта на знак пратэсту супраць цэнзуры. Другі — «на знак салідарнасці са страйкоўцамі і звольненымі». У траўні 2021 года з краіны з’ехаў Ілля Ясінскі. У 2020-м ён удзельнічаў у пратэсных маршах. Падчас аднаго з іх яго затрымалі і зламалі пазванкі. У канцы снежня 2021 года звольнілі мастацкага кіраўніка тэатра Аляксандра Гарцуева. Ён узначальваў РТБД з 2012 года.

У сакавіку — пачатку красавіка 2022 года з тэатра сышлі ці былі звольненыя чатыры акторы: Алена Баярова, Марыя Пятровіч, Марына Здаранкова і Максім Шышко. Апошняга 27 лютага затрымлівалі на антываеннай дэманстрацыі.

Новай дырэктаркай РТБД стала Святлана Навуменка. Яна нарадзілася ў 1964 годзе. Па першай прафесіі яна акторка, працавала ў сталічным ТЮГу. Потым атрымала рэжысёрскую адукацыю, ставіла спектаклі ў розных беларускіх тэатрах. У РТБД працуе з 2010 года.

Апошнім часам звальненні ў беларускіх тэатрах зрабіліся рэгулярнымі. У пачатку красавіка 2024 года быў звольнены мастацкі кіраўнік віцебскага тэатра «Лялька» Віктар Клімчук. У сакавіку — дырэктар сталічнага Музычнага тэатра Сяргей Пукіта. У красавіку страціў пасаду і дырэктар Беларускага тэатра лялек Дзмітрый Сямёнаў. Праўда, пазней высветлілася, што ён пайшоў на павышэнне — стаў намеснікам кіраўніка ўпраўлення культуры Мінгарвыканкама. У траўні быў звольнены мастацкі кіраўнік Нацыянальнага тэатра оперы і балета Валянцін Елізар'еў.